留低d腳毛比d初玩既朋友，多個參考既文章 之所以打呢篇文，因為近排天氣變，刺激魚隻更容易繁殖 所以繁殖頭胎更容易成功 前提 如果你未試過短鯛繁殖，又想試下。買魚，大陸產台灣產德國產本地產之中，我建議揀本地產，因為呢類魚相對上易養易散。價錢唔一定會平，而家成本主要都係交租，香港成本比外國高太多。呢d本地魚有個好處，因為本地化左，接受到香港水質，繁殖難度會下降。 講開唔同地區既魚，落唔落激素既問題我無辦法驗證，單從魚既質素出發就算。大陸既魚比起十年前進步左好多，無咁易死，但死亡率仍然係三個地區之冠，質素就好飄忽，身型普遍係背高，身粗，天線短，無火。台灣產既魚最大特徵係個頭係斜線，就唔似野生魚頭咁圓，但背鰭同腹鰭都可以相當高。德國產既魚就係頭最似野生魚，頭圓。以上講既野非常籠統，我特別要講講一點，每個家族(complex)既短鯛都有唔同既特色，唔係所有短鯛都係修長，背直，天線高的。如果想睇多少少有關於短鯛家族既資料，可以去tom and martin 既網站睇下。 http://apisto.sites.no/page.aspx?pageid=116 by Mike Wise 因為有文獻，而家養短鯛易過以前好多。有好多品種都易分同埋清楚好多。 魚缸設置 我一般係用30X30X30cm既缸養一對，如果龍紋都係預期用60*45*36cm缸養，只係無用RO水，孵唔到咁解。用一個坐地水妖係最好，一兩個沉木，一個鯛樽，舖泥炭土酸葉做底，避免用清缸養，原因係如果初生魚苗直接接觸玻璃面，有好多細菌接觸魚苗，死傷率可能會提高，用砂底都OK的。我自己一向都唔開暖管，就算係最凍果兩三日，因為我發現開完暖管死傷仲大過唔開，原因不明。不過我建議家居環境都係要照落，因為屋企會開窗開門開冷氣。 水設定 呢樣野，係養魚最重要果步。我習慣都係三胞胎過濾器再加軟水樹脂，然後再養水，再落缸。如果屋企既話，我做法係水喉水，加入實惠大水箱 (60*45*40cm高果款 七年前買就$100左右)。水箱內24小時打氣，放個細水泵，方便換水。加草泥丸落去，目的同落軟水樹脂一樣。 不過有部分魚真係要特別注意TDS(GH)，但今次呢篇文唔打算提及佢地，因為太多細節要獨立講。今次我刻意講買唔同地區既魚，就係因為呢d魚已經可以人工繁殖，如果初養就養二線或者伊仔呢類比較麻煩既魚，挫敗感超強。無理由初養就挑戰大佬，一來貴，二來比較易死。 pH調到大概6-6.5就已經足夠，唔需要刻意再調酸。 喂食 呢樣個個人唔同，紅蟲，黑蟲活體，水蚤，BBS我都有，魚糧我都有tetra bits，莫斯特全系列糧。足夠營養d魚先會容易繁殖，如果連魚都食唔夠，邊有足夠既力量繁殖? 有d人話自己散左十條八條，會問點解得咁少，其中一個可能就係呢點。 比個大概數字大家參考下，鳳尾：40－60左右，阿卡西，60－120，三線，30－50，酋長，30－40條。 繁殖跡象 如果d魚養到咁上下，佢地會開始有繁殖跡象。母魚會慢慢變黃，同埋會成日引條公魚，公魚都會有震頭既情況出現。咁就可以準備好繁殖缸同埋擺佢地落去，等佢地繁殖。 繁殖後 通常頭一胎親魚經驗不足，佢地都會全部食返哂，或者數量超少。咁第二胎先至似樣，數量先會回復正常。親魚會帶出仔魚出游，呢個畫面對所有新手黎講都好有趣，同埋好獨特。 仔魚食乜好 食bbs就係最簡單，如果可以就比水蚤佢地。細心照顧佢地三個月就開始成型。頭兩星期最好唔換水，因為初生bb對水質比較敏感，到咁上下先可以接受到換水。 最後，如果大家有咩想再問，答到就盡量答。